Puntraschigna desista per il mument da relaschar ina zona da planisaziun per la vischnanca, quai scriva la suprastanza communala. La raschun è l'iniziativa che pretenda dapli spazi d'abitar per indigens. Cunquai che quella è reussida, vul la vischnanca tant pli spert dar la pussaivladad a la populaziun da prender ina decisiun da principi.
Quai duai gia esser il cas tar la proxima radunanza communala dals 3 d'avrigl. Fin lura vul la vischnanca spetgar cun relaschar la zona da planisaziun sco mesira preventiva. En connex cun il martgà d'abitaziun ha la suprastanza da Puntraschigna er decis da laschar far ina analisa da la situaziun. Sin basa da quella vul la vischnanca lura prender mesiras concretas.
Iniziativa per spazi d'abitar per indigens
A Puntraschigna era reussida in'iniziativa che vul far frunt a la mancanza d'abitaziuns per indigens. Sco che la suprastanza communala ha scrit ils 23 da schaner, saja l'iniziativa vegnida suttascritta da 75 persunas. Iniziants saja stada la gruppa locala «Impiegos da Puntraschigna».
L'iniziativa pretenda dapli emprimas abitaziuns, per quai duai vegnir adattada la lescha da segundas abitaziuns. Er per uschenumnadas chasas da dretg vegl cun lubientschas da renovar u engrondir tranter ils 11 da mars ed ils 31 da december 2012 duain porscher in terz da lur surfatscha sco emprima abitaziun.
