Sco raschun per sa retrair ha Daniel Peter numnà ch'i na fetschia betg senn pli d'occupar duas funcziuns: da manar la direcziun administrativa e quella dal project da bajegiar. Perquai sa retira el la fin da l'avrigl 2023, uschia hai num en ina communicaziun da l'Infra Plazza aviatica regiunala Samedan. «Jau vi puspè ma concentrar sin il svilup e management da projects e represchentar ils patruns da construcziun, mias cumpetenzas-clav», vegn el cità en la communicaziun.
Trais demissiuns en la cumissiun administrativa
Ultra da quai vegnan trais plazzas libras en la cumissiun administrativa. Gaudenz Ambühl, Fredi Gmür e Christian Meuli sa retiran. Ils sezs vegnan puspè occupads en ina procedura averta durant la conferenza da la plazza aviatica ils 14 d'avrigl. Il postdal directur da la plazza aviatica vegn scrit ora durant il favrer.
Gian Peter Niggli, president ad interim da la cumissiun d’administraziun, deplorescha che Daniel Peter chala. Ses mandat saja sa midà vairamain fitg durant ils davos onns. En il futur duain la direcziun ed il project da bajegiar vegnir separads cleramain. Sche Daniel Peter possia accumpagnar vinavant il project, vegnia anc sclerì.