L’Uniun dals Grischs ha envidà e var 60 persunas han dà suatientscha a l'invit. Festivà è vegnì il 120avel anniversari da la societad UdG, che s'engascha dapi 120 onns per la lingua e cultura rumantscha ladina da l’Engiadina, la Val Müstair e Bravuogn.
Nus empruvain da colliar las generaziuns, pertge che la Rumantschia è ina cuminanza da giuven e vegl.
Igl es stà ina festa speziala en l'hotel Scuol Palace en l'Engiadina Bassa. Igl ha dà aperitiv e tschaina, musica e l'occasiun da star da cumpagnia, da conversar e celebrar la lingua e cultura ladina.
120 onns UdG – l'istorgia
Il 1904 ha il reverenda e redactur dal «Fögl d'Engiadina», Otto Gaudenz, fundà l'Uniun dals Grischs a Schlarigna. L'intent era da lez temp, da cumbatter ils privels da la germanisaziun, da far insatge cunter la resignaziun ed ils sentiments da submissiun en l'intschess ladin. L'onn da fundaziun, pia il 1904, eran var 200 persunas commembras e commembers da l'Uniun. Suenter il temp da la Segunda Guerra mundiala er il dumber anc bler pli grond ed oz es el puspè sin 200 commembers e commembras.
In'uniun per giuven e vegl
Il num UdG – Uniun dals Grischs – tun in zichel da chavels grischs e cudeschs plain pulvra, ma es quai propi uschia?
Grisch è ina colur interessanta ed in mix da tut las autras colurs.
La suprastanza da l'uniun è tut autra che grischa – la nova suprastanza è giuvna ed innovativa. Cun novas ideas, bler idealissem e fiduzia guardan els cun optimissem en il futur. Lur giavisch per lur uniun è ch'i dat dapli sustegn e che la lingua rumantscha resta en il cor d'in e mintgin.
Or da l'archiv:
