Dacurt ha il chantun Grischun preschentà las cifras davart l'egualisaziun da finanzas per l’onn 2025. Las vischnancas da la Regiun Malögia han da contribuir dapli en la gulivaziun da resursas.
Contribuziun da bundant dus terzs
Cun bundant 15 milliuns francs da l’onn 2024 ha la Regiun Malögia contribuì a la gulivaziun. Quai èn 65% da las contribuziuns totalas. Ils presidents e las presidentas da las vischnancas chattan ch'il chantun Grischun duai ir sur ils cudeschs. Els admoneschan che la gulivaziun da resursas saja uschia fitg dependenta dad ina Regiun.
Nus na mettain betg en dumonda il sistem da gulivaziun da resursas. La Regiun Malögia vuless dentant discutar ils parameters per la calculaziun da las contribuziuns.
Investiziuns na betg resguardadas
La regiun Malögia remartga era vinavant, che na tut las investiziuns vegnan resguardadas en la calculaziun da las cifras e grondezza da las contribuziuns. In bun exempel sajan las investiziuns che las vischnancas han fatg en l'infrastructura per il turissem.
Discussiun è averta
Martin Bühler, cusseglier guvernativ e manader da l'uffizi da finanzas e vischnancas, ha encletga per las remartgas da las vischnancas da la Regiun Malögia. Tenor el saja il chantun pront da discutar. El admonescha però era, da betg storscher vi da las rodinas da tut il sistem, e quai senza ina analisa fundada. Il sistem saja bun, ma midaments sajan pussaivels.
