Bunas novas per ils glatschers svizzers. L’enviern cun blera naiv ha procurà per ina situaziun legraivla per ils glatschers. Tenor il glaziolog Felix Keller è la cuverta da naiv sin il Vadret da Morteratsch en l'Engiadina creschì a passa 80 milliuns tonnas. Cumpareglià cun auters onns sajan questas cifras legraivlas. Normalmain haja il Vadret da Morteratsch radund 65 milliuns tonnas naiv.
Anc memia baud per conclusiuns
Felix Keller agiunscha però, ch'i na saja betg anc cler, sche quest onn restia era legraivel per ils glatschers. Quai pervi da las temperaturas la stad. Il 2019 saja la situaziun stada sumeglianta, cun ina gronda cuverta da naiv sin ils glatschers la fin da matg. Las temperaturas chaudas dal mais da zercladur 2019 hajan entant maglià davent quasi tut las reservas da naiv sin ils glatschers. Quest onn ha Felix Keller la speranza, che la situaziun na sa repetia betg. Conclusiuns possia el però far pir la fin da la stad.
Era sch'i n'è il mument betg bell'aura, almain è quai bun per ils glatschers.
Il gieu cun naiv e temperaturas
Per ils glatschers saja la naiv in factur fitg impurtant, uschia Felix Keller plinavant. Dapli naiv che quai dettia, pli gronda vegnia la cuverta sin ils glatschers ed uschia pli gronda la schanza che las temperaturas autas da la stad fetschian pli pauc donn al glatscher. Prognosas precisas davart la naiv en l’avegnir na possian però betg vegnir fatgas, di Keller.
Sper la naiv è era la temperatura in factur impurtant. Quellas pon vegnir prognostitgadas a moda pli precisa. Ellas creschan sur tut onn e quai era en regiuns pli autas. Per l’enviern vul quai dir che la schanza da navaglias crescha e che las periodas cun temperaturas arcticas vegnan pli curtas.