Suenter ch’ils restaurants han gì da serrar lur portas durant l’enviern passà, saja la situaziun per ils gastronoms daventada anc pli difficila. Quai surtut cun quai che numerus emploiads han bandunà la branscha durant la pandemia, uschia l’ustier engiadinais Primo Semadeni. Insumma è la tschertga da persunal scolà difficila. El sez haja dentant investì en «sia glieud».
Jau hai pajà durant tut il temp 100% da la paja a mes 17 emploiads, e garantì uschia er in’occupaziun segira per els.
La branscha da la gastronomia collian blers anc adina cun pajas pli bassas, quai che na saja dentant betg il cas. Per il persunal dettia numnadamain ina paja minimala, suttastritga il gastronom engiadinais. Tar quella vegnia savens tiers in bunamaun.
Sforzs da recrutaziun
Per puspè animar e recrutar nov persunal vegnia fatg bler, er tras Gastro Grischun, agiunscha Primo Semadeni. Per exempel vegnia preschentada la lavur en la gastronomia en moda attractiva gia en las scolas. Ultra da quai tschertgian els savens glieud en l’Italia ch'è vischina a l’Engiadin’Ota.
