Forum da turissem - Strategias per in enviern verd

L’entschatta ha fatg il climatolog da la ETH a Turitg Reto Knutti. Las regiuns da skis enfin radund 1'500 meters sur mar stoppian reponderar la purschida – e betg restar mo sin il tema sport d’enviern. Ils davos 100 onns saja il cunfin da naiv s'augmentà per radund 400 meters, ed ils proxims onns stoppian ins spetgar anc ina giada in augment dal cunfin da radund 400 meters.

Tenor Knutti è il turissem en general dumandà da reponderar sias strategias, e da sa focussar dapli sin la purschida da stad. Regiuns pli autas han percunter bunas schanzas era en ils proxims onns, ed astgan sa focussar vinavant sin las spiertas dal sport d’enviern.

En ina segunda part ha il comanader da la Grischconsulta Cussegliaziuns SA da Maiavilla, Michael Hartmann, preschentà differents scenaris sco regiuns da skis pudessan prender per mauns la tematica. In dals scenaris preschentads è era il fabritgar enavos infrastructura. Sche la regiun da skis ha en l'avegnir damain giasts e memia blera infrastructura – èsi impurtant da diminuir questa purschida per restar rentabel.

Durant il forum da turissem ins ha era preschentà ideas per in enviern verd. E finalmain han ils responsabels d'ina regiun da l'Austria explitgà, sco els mettan il focus cumplettamain sin il tema durabilitad, e quai cun success.

Il 33avel Forum da turissem per regiuns alpinas ha gì lieu en il Montafon (Austria). Oravant tut CEO’s, responsabels e cussegliers administrativs da gestiuns da pendicularas piglian part al forum. Els vegnan da la Svizra, da l'Austria e da l'Italia.

Impressiuns dal forum, tegnì en la regiun austriaca Montafon