En il Vnuost – pli exact sur Prad en il Tirol dal sid – è gievgia suentermezdi enturn las 14:00 rut ora in fieu da guaud: Pertge na san ins anc betg. Las inquisiziuns èn vegnidas instradadas.
Tras vent dal nordost è il fieu sa derasà en direcziun Stilfs – pli datiers da la Svizra. Sco las autoritads scrivan sajan actualmain radund hectaras guaud vegnidas tutgadas da las flommas.
Enturn 400 pumpiers èn stads en acziun la gievgia, tranter quels er tals da la Val Müstair. Las lavurs da stizzar vegnan engrevgiadas perquai ch’i arda en in territori mal accessibel e perquai ch’ils helicopters ston ir lunsch per l’aua. Il fieu n’è anc betg stizzà, ma la situaziun saja sa calmada. Sco mesira da precauziun han ins evacuà 5 persunas ed il muvel d’in bain puril. Da la Val Müstair è il fieu anc davent radund 5 kilometers.
Tenor indicaziuns dals pumpiers Vnuost Sura quintian ins d'avair propi sut controlla il fieu en trais dis.
Ina sfida speziala saja stada da guardar ch’il fieu na tschiffa betg ina antenna d’emissiun da la RAS. Sche quella vegniss donnegiada crudass ora la rait da radio, televisiun e telefonin da l’entir Vnuost.
En la regiun da Val Müstair e Scuol vala actualmain in privel d'incendi grond:
En las valladas talianas dal Grischun è il privel fitg grond ed il vala in scumond absolut da far fieu.
Tar privel grond suondan ils scumonds
Sch'il stgalim da privel vegn auzà da considerabel sin grond datti pli probabel er scumonds da far fieu:
- En vischinanza dal guaud, sin basa da la lescha da guaud.
- Scumonds locals tenor las autoritads communalas
- Scumonds u restricziuns en connex cun fieus artifizials (era en la cumpetenza da las vischnancas).