Il chastè da Tschanüff è vegni bandunà l'onn 1780. Suenter è quel crudà ensemen adina pli ferm, uschia ch'ins na pudeva betg pli visitar la ruina ord motivs da segirezza. Avant radund 20 onns ha la Fundaziun Tschanüff lura entschet cun la restauraziun. Oz è la ruina puspè segirada e transibla.
Musica e divertiment sut tschiel avert
Cun finir las lavurs ha la Fundaziun Tschanüff inizià il festival, per pudair laschar reviver quest lieu istoric. Durant trais fin d’emnas han lieu trais concerts tuttafatg variants, suttastritga la responsabla da medias dal festival Martina Hänzi. Il cumenzament fan ils «Fränzlis da Tschlin», la gruppa da musica enconuschenta che tutga quasi tar la vischnanca da Valsot. Quint fan ils organisaturs cun radund 200 persunas per saira. Durant il mais d’avust strasunan instrumentalists da flad da sturs tranter la miraglia da la ruina – igl è il concert da la GR-Brass. E per terminar l'emprim festival datti il «Musical sin turnea» cun l'inizianta Cinzia Regensburger da Scuol.
Il festival duai esser in project da pilot – sche quel funcziuna èn garantidas ulteriuras occurrenzas enturn la ruina a Ramosch.
Ils custs da radund 70'000 francs han ils organisaturs ramassà tant tras donaziuns e sponsoring, sco er grazia al sustegn da la vischnanca da Valsot. La finamira saja da pudair cuntinuar annualmain cun in program cultural varià cun musica, chant e teater en lingua rumantscha.
