En Engiadin'Ota hai dà la notg sin glindesdi spezialas pitgas da glisch. Las pitgas verticalas vesan ora sco radis da glischs fitg fermas drizzadas vers tschiel u sco radis da laser dal univers. Furmadas vegnan las pitgas dentant da pitschnas pattinas da glatsch, declera SRF Meteo.
-
Bild 1 von 3Legenda: A Samedan han ins pudì observar il glindesdi bunura pitgas da glisch. Urs Pfister -
Bild 2 von 3Legenda: Quai n'è dentant betg in fenomen cosmic... Andreina Gaudenzi
-
Bild 3 von 3Legenda: ... mabain plattinas da glatsch che reflecteschan la glisch da la terra. Monika Giovanoli
Per che las pitgas da glisch possian sa furmar dovri las suandantas premissas:
- aria fitg fraida
- nagin vent
- auta umiditad da l'aria
Uschia èsi stà la notg sin glindesdi per exempel a Samedan. Là èn las temperaturas crudadas sin -26 grads. Sur il fund da la val èn uschia sa furmadas or da l'umiditad da l'aria pitschnas plattinas plattas da glatsch. Vi da questas plattinas ha lura la glisch reflectà che vegniva si dal plaun. Quai vesa lura ora sco pitgas da glisch. Pli grossa che la stresa da plattinas è, pli marcanta che la pitga cumpara.