En ina sesida extraordinaria cun la cumissiun da turissem ed il cussegl communal – ha la suprastanza communala da San Murezzan discutà co ina collavuraziun pudess vesair ora en avegnir. Sin basa da questa discussiun propona la suprastanza da lantschar ina collavuraziun parziala cun la destinaziun turistica Engiadina San Murezzan SA.
En pli duai San Murezzan Turissem vegnir distatgà da l'administraziun communala. Cun quest pass duessan las structuras turisticas cumplexas ed ineffizientas da San Murezzan daventar pli simplas, scriva la vischnanca.
La finamira da la reorganisaziun è che la marca San Murezzan duess vegnir elavurada en avegnir sut in tetg. Il team da la marca San Murezzan da la destinaziun duai damai vegnir integrà en San Murezzan Turissem.
Fin la fin dal 2023 duess la nova collavuraziun esser reglada. L'ultim pled en chapitel ha il cussegl communal, quel sto approvar questa proposta a chaschun da sia proxima seduta en duas emnas. Sch'el fa quai, cumenza la suprastanza las contractivas cun la destinaziun e cun las autras vischnancas da l'Engiadin'Ota.
