Chasas engiadinaisas èn enconuschentas per lur sgrafits. Sgrafits sin stoffa u cheramica dentant main. Quai duai sa midar. En la Butia Schlerin a Sent da Heidi Laurent-Domenig e sia mamma Lidia Domenig-Etter hajan ins gì l'idea da cumbinar vaschella cun ils motivs da sgrafits. E quai cun success. L'idea è uss nominada per il duel da start-ups dal Forum grischun per impressaris giuvens.
Grond’investiziun en candidatura
Sco che Heidi Laurent-Domenig ha declerà, ella è la manadra da gestiun da l’affar «Butia Schlerin Cafè creativ a Sent, haja ella gì da s’occupar intensivamain cun lur products avant ch'inoltrar il project per la candidatura. Analisas cun las fermezzas, ma er las deblezzas da lur idea han gì da vegnir fatgas, ina procedura intensiva.
Cumbinar tradiziun cun cheramica
Cun lur novs products – en furma da vaschella e stoffa che vegn ornada cun il tipic sgrafit engiadinais – creeschan mamma e figlia ina purschida particulara, tradiziunala e durabla en in regiun periferica. La proxima finamira da las duas dunnas è da far vegnir anc pli enconuschents lur products en tut la Svizra.
La preschentaziun dals trais finalists dal duel da start-ups dal Forum grischun per impressaris giuvens ha lieu ils 24 d’october a Cuira.
RR actualitad 11:00