La notg da glindesdi sin mardi è vegnida giu ina lavina spontana en la Val da Barcli. Quella sa chatta sin il Pass dal Fuorn, tranter Zernez ed Ova Spin.
Sco quai ch’il manader da l'uffizi da construcziun bassa en Engiadina Bassa, Jachen Kienz, ha ditg envers RTR sa tractia da la medema lavina ch'è vegnida giu l’onn 1999 ed aveva devastà tranter auter era la lingia d’auta tensiun. Quai è era questa giada stà il cas. Plinavant ha la lavina era demolì parts da la via chantunala.
Cunquai ch’il laviner n'è betg sa svidà dal tuttafatg prevesan ils responsabels da siglientar quella part. Ord quest motiv stoppian ins far quint, ch’il Pass dal Fuorn restia anc per plirs dis serrà, uschia Kienz
Consequenzas per la producziun d'electricitad
Sco quai che las Ouvras Electricas d’Engiadina communitgeschan, haja la distatgada da la lavina era consequenzas sin la producziun d’electricitad. La lavina ha stgarpà ora ina pitga d’auta tensiun e cunquai era destrui la rait d’electricitad. Per il mument è l’ovra electrica Ova Spin perquai ord funcziun. Quai vul dir che las Ouvras Electricas d’Engiadina na pon actualmain betg furnir electricitad sin il martgà svizzer. Il provediment d’electricitad en Engiadina e Val Müstair è dentant garantì.
-
Bild 1 von 2. Pertutgada da la lavina n’è betg mo la via en direcziun Val Müstair, mabain era la rait d’auta tensiun. Bildquelle: Ouvras Electricas d'Engiadina SA.
-
Bild 2 von 2. Per rivar en la Val Müstair duvr'ins anc dapli pazienza. Bildquelle: RTR, David Spinnler.
Ils responsabels èn vidlonder da chattar ina soluziun provisorica, quai che pudess durar plirs dis ed emnas.
RR actualitad 12:00