Sut il stritg resta per l'onn da gestiun 2020/21 in minus dad in milliun francs. La Engiadina Mountains SA ha registrà sur l'entir onn da gestiun bundant 12% pli paucas primas entradas ed in minus da stgars 35% en la gastronomia. Quai scriva il cussegl d'administraziun en il rapport annual.
In grond minus tar la gastronomia
L'enviern 2020/21 era bler pli nausch che la stad 2021. Uschia han las pendicularas da l'Engiadin'Ota registrà per l'enviern in minus da 17% tar las primas entradas ed in minus da 56% tar la gastronomia. Dad ina vart hajan mancà blers giasts internaziunals, da l'autra vart hajan las ustarias serradas durant l'entir enviern manà a questas cifras.
Ina fitg buna stad
La stad percunter era fitg buna ed ha manà a passa 1% dapli primas entradas en congual cun la stad 2020 ch'era ina stad da record per la Engiadina Mountains SA. Ed era la gastronomia ha nudà fitg bunas cifras, uschia ch'il minus total è sa reducì sin la fin d'october 2021 sin stgars 35% en congual cun l'onn avant.