Ils implants da sport Minschuns SA han decidì ad ina radunanza d'acziunaris extraordinaria ils 17 da zercladur dad augmentar il chapital d'aczias per 1 milliun francs. Quai en duas pass: 600'000 francs duai il cussegl d'administraziun generar infra 3 mais. Ulteriurs 400'000 francs duai il cussegl administrativ lura generar infra 2 onns.
Finanziaziun dad ina pendiculara ed indrizs per ennavar
Il nov chapital d'aczias duai servir per las investiziuns planisadas en connex cun il project La Sassa. Minschuns vul fabritgar ina nova pendiculara da Tschierv si Minschuns ed indrizs per ennavar la pista che maina da Minschuns a Tschierv. Per quest intent aveva la vischnanca da Val Müstair decidì da sustegnair ils implants da sport Minschuns cun 1.3 milliuns francs à fond perdu, cun 1.7 milliuns francs che la vischnanca avess da survegnir cun la vendita da terren per construir in vitget da vacanzas e cun ina garanzia da deficit per in credit dad 1.4 milliuns francs che Minschuns survegn dal chantun.
Sche Minschuns cumenza cun la fabrica da la nova pendiculara è era l'investur Domenig SA da Cuira obligà da cumenzar cun la fabrica dal vitget da vacanzas La Sassa a Tschierv. Là duai dar radund 250 novs letgs.
RR novitads 11:30