Engiadina - Il Chalandamarz è enavos

Suenter dus onns «pausa da corona» ha il Chalandamarz puspè lieu. Cun plumpas, brunsinas, zampuns, scrollas e giaischlas van ils uffants l’emprim da mars tras il vitg e stgatschan l’enviern. Mintga vischnanca ha sias atgnas tradiziuns. Uschia a tunan era las melodias da las chanzuns da Chalandamarz nagliur tuttina.

La gallaria dal Chalandamarz 2022

Differenta vestgadira

Era las blusas blauas e las chapitschas cotschnas na valan betg dapertut sco vestgì da Chalandamarz. En bleras vischnancas vegn decorà bler cun rosas da palpiri. Organisada vegn la festa savens da las scolaras ed ils scolars ils pli vegls – las patrunas ed ils patruns.

Chalandamarz live tar RTR

Chalandamarz manchentà

Entant ch’ils blers uffants sa legran che l’usanza da Chalandamarz po puspè vegnir festegiada quest onn, èn auters plitost trists. Pervi da la pandemia han els manchentà lur Chalandamarz. Quel mument en la 9avla classa, cura ch’els èn sez ils patruns e las patrunas da la festa.

 Nino Grossrieder e Ladina Grass èn dus dals giuvenils che stattan simbolic per tut quellas e quels che han gì da desister ils ultims dus onns sin lur Chalandamarz tut persunal.  

Usanza antica

L’usanza da Chalandamarz è ina veglia restanza dal temp dals Romans cur ch'il mars era l’emprim di dal chalender giulian. Cun il ritual pajaun vul ins stgatschar ils nauschs spierts da l’enviern e clamar uschia la primavaira. Part da quella usanza èn prest dapertut tils ed in bal la saira.