Per il president communal da Puntraschigna, Martin Aebli saja la decisiun da la radunanza communala surtut stada ina dal cor. Sper la colliaziun emoziunala dapi decennis cun Samedan, haja er la sceptica envers San Murezzan e ses ultims projects giugà ina rolla impurtanta tar la votaziun.
Spetgar tge ch’ils auters fan
Per il mument hajan ins da spetgar ils resultats da votaziun da las autras duas vischnancas davart in credit da planisaziun per ina chasa da tgira per Segl, Silvaplauna, San Murezzan e Puntraschigna.
Credit da planisaziun da 2,3 milliuns francs
San Murezzan decida ils 5 da zercladur a l’urna, Silvaplauna vuscha ils 22 da zercladur en chaussa. Sco che la presidenta communala, Claudia Troncana ha ditg ad RTR, ponderesch ins da suttametter a la radunanza communala ina dumonda da credit cun in import variabel. Cun il na da Puntraschigna mancan 450'000 francs vid il credit da planisaziun per la chasa da tgira a San Murezzan.
Project Du Lac betg anc giu da maisa
Tenor il president communal da San Murezzan, Sigi Asprion, na saja il project Du Lac a San Murezzan anc betg mort. Pussaivel saja er ina cuntinuaziun dal project be cun trais vischnancas.
Proseguir vinavant duas vias u betg
Da sclerir saja er proximamain sch’ins veglia sviluppar vinavant duas strategias per ina chasa da tgira en Engiadin’Ota. Uschia sco ch’ils presidents communals da las 11 vischnancas avevan decis, u sch’ins sa concentreschia la fin finala be sin ina varianta Promulins Samedan.
Chasa da tgira en l'Engiadin'Ota - ina lunga istorgia
RR novitads 12:00
