Las trais sereneras existentas a Schlarigna (Staz), a Bever (Sax) ed a S-chanf (Furnatsch) èn tranter 33-45 onns veglias e na correspundan betg pli a las pretaisas dad oz.
Capacitad flexibla
La serenera nova per las 9 vischnancas participadas, vegniss fabritgada en plirs moduls – vul dir ch’ins rivass da reagir tut tenor da basegn, sin ils mais ferms u quels da stagiun morta. Las trais sereneras existentas èn concepidas per 114’000 abitants. La nova fiss pli pitschna, cun ina capacitad da 90’000 persunas.
Pli durabla e economica
L’investiziun da 76,5 milliuns francs en in project pli pitschen, pli economic e durabel, han da purtar las 9 vischnancas tranter San Murezzan e S-chanf. Mintga vischnanca ha la pussaivladad dad introducir ina taxa speziala per la finanziaziun da la nova serenera. Ils raps na vessan betg da rivar or da la chascha da las impostas, ha declerà il vicepresident da l’uniun ARO 2020, Thomas Nievergelt.
Cumenzar da fabritgar gia l'onn proxim ?
La radunanza da delegads ha approvà la missiva per la dumonda da credit. Ussa ston anc decider ils votants da las singulas vischnancas en chaussa fin la fin da quest onn. Sche tut va tenor plan, cumenzass il fabricat da la nova serenera centralisada a S-chanf gia proxim onn e duess esser pront per l’onn 2020 / 2021.
