Motors electrics èn ozendi adina pli derasads. Sper forz’electrica pon ins far ir quels motors er cun aua, cun idrogen. Ina varianta anc pauc derasada. L’emprima producziun d’idrogen cun in tancadi d’idrogen en il Grischun duai vegnir fabritgà a Samedan en Engiadin’Ota.
L'interpresa Idrogen Engiadinais SA ha inoltrà la dumonda da fabrica tar la vischnanca. Il project prevesa in implant da producziun ed in tancadi d’idrogen en il territori d’industria Cho d’Punt per var 3.5 milliuns francs, di Urs Pfister commember dal cussegl administrativ da l’Idrogen Engiadinais SA. Il tancadi duai avair capacitads per var tschintg camiuns u radund 20 autos. Sche tut va sco previs, duai il tancadi avrir l'onn 2023.