Tge è sa midà ils ultims 80 onns?
Victorina Camichel viva anc adina en sia chasa paterna amez il coc istoric dal vitg da Bever. Quella chasa en tipic stil engiadinais è vegnida construida il 18avel tschientaner. Cura ch'ella era anc giuvna marschava quai pulit en quai quartier dal vitg.
Qua è quai mort ora in zichel. Las chasas èn bandunadas u èn abitaziuns da vacanzas.
Era la muntada dal rumantsch è sa midada. Pli e pli paucs discurran anc rumantsch a Bever. Il puter vegn sulettamain inditgà da 12,8% da la populaziun da Bever sco linguatg principal (davosa dumbraziun l'onn 2000). L'onn 1940 eran quai anc 50%.
En famiglia hajan els adina discurrì rumantsch, di Victorina Camichel. Ella na chapescha betg daco che blers che'èn creschids si a Bever n'han betg pli emprendì rumantsch: «Cura ch'els èn alura creschids stattan els mal, ch'els n'han betg emprendì puter pli baud.»
Dretg da vuschar pir il 1975
Sco davosa vischnanca en l'Engiadin'Ota ha Bever introducì il dretg da vuschar per las dunnas l'onn 1975. Puntraschigna aveva per exempel gia l'onn 1968 l'egualitad da vuschar tranter um e dunna.
Victorina Camichel, che ha lura gì 35 onns, n'ha dentant betg fatg uschè cas da quai. Ell'aveva quai da temp simplamain uschè bler da far, ch'ella n'è gnanc sa fatschentada pli fitg cun quai.
Jau n'hai mai gì il sentiment ch'jau n'hai betg dretgs.
