La suprastanza communala na saja betg perencletgà d’avrir l’acziunariat da l’organisaziun e da surdar ina part a las gruppas d’interess. Perquai haja la suprastanza communala decis unanim da betg suttascriver la nova cunvegna da prestaziun cun l’Engiadina San Murezzan SA. La vischnanca vul sa focusar en avegnir sin ils agens basegns. Ina collavuraziun regiunala saja però vinavant impurtanta, la dumonda saja en tge furma.
Valitar nov la situaziun
Per la regiun signifitga la decisiun da Silvaplauna da valitar danovamain la situaziun e da ponderar il futur da l’organisaziun. Quai ha ditg Andrea Gilli, il president da la regiun Malögia, sin dumonda dad RTR. Perquai che Silvaplauna n’haja betg disditg il contract a temp util, stoppian ins uss sclerir las pussaivladads per la collavuraziun futura. Atgnamain cuntinueschia il contract fin la fin da l’onn 2024. Tenor Andrea Gilli fetschia questa decisiun vegnir tut anc pli cumplitgà.
La destinaziun turistica ha elavurà durant ils ultims dus onns ensemen cun ils partenaris d’interess la nova cunvegna da prestaziun che duai ir en vigur al principi da l’onn 2023.