Ils curs intensivs da rumantsch a Scuol vegnan visitads ils ultims onns adina puspè cun cifras da record. 153 persunas èn s‘inscrittas quest onn per in dals curs ch'han lieu durant questa emna.
Garantir l'avegnir
Per pudair instruir tantas persunas dovri era la magistraglia. Quest onn s‘engaschan 14 persunas sco mussadras e mussaders a Scuol. Nov èn quest onn Adrian Gisler e Fabio Lehnder da Zernez da la partida. Dus umens giuvens che vulan emprender sco praticants d‘instruir rumantsch ad ina classa.
Ramassar experientscha
La pli gronda part dals manaders dals curs da rumantsch èn magistras cun ina scolaziun pedagogica. IIs dus praticants da Zernez vegnan a cumenzar lur studi d‘economia a la HSG a Son Gagl quest atun. Tuttina vulan els s‘engaschar per la lingua rumantscha. «Cun quest praticum poss jau ramassar experientschas co ch'ins mussa ad interessadas ed interessads nossa lingua materna che ma stat ferm a cor», di Adrian Gisler.
Da sa preschentar davant glieud e mussar insatge, hajan tant Fabio Lehner sco er Adrian Gisler gia emprendì durant l‘ultim onn ch'els èn stads a militar. Cun questa emna d‘emprova vulan els suenter era cuntinuar cun instruir rumantsch, tut tenor er en furma virtuala.
Premiera als curs da rumantsch
Sco ch'il manader dals curs intensivs da rumantsch vallader Linard Martinelli ha suttastritgà, n'haja el quest onn betg gì grondas difficultads da chattar magistras e magisters che mainan ils curs. Dentant saja da guardar era per ils proxims onns. E la furma d‘in praticum para dad esser ina varianta che funcziunescha.
