Mai na crudar en la rutina
Per il cumandant partent da Samedan-Puntraschigna Florian Flück è stada la pli gronda sfida d’unir ils pumpiers ad ina squadra, era cun resguardar las differentas mentalitads. Quai saja era reussì bain ad el, uschia l’um da 48 onns. Ussa surdettia el dentant gugent la batgetta en novs mauns per evitar che sia lavur daventia insacura be pli rutina.
Jau sun cuntent che jau hai chattà insatgi che batta precis sco jau quai che pertutga la lavur da pumpiers.
Per che la surdada d’uffizi saja uschè simpla sco pussaivla, ha ses successur Dragan Savic pudì guardar ils ultims dus onns a Florian Flück sur la spatla. Dragan Savic è pumpier dapi 18 onns ed ha fatg las scolaziuns necessarias per surpigliar il post da cumandant. Per el saja la pli gronda sfida da succeder en passidas fitg grondas.
-
Bild 1 von 2. Florian Flück a sanestra e Dragan Savic. Bildquelle: RTR.
-
Bild 2 von 2. Florian Flück surdat la batgetta a Dragan Savic. Bildquelle: RTR.
Pumpiers Plaiv
In midament datti era per la squadra da pumpiers en la regiun La Plaiv, nua che Peider Gotsch chala sco cumandant suenter 13 onns.
Per mai èsi impurtant da surdar il commando ad ina persuna pli giuvna ed energetica che porta nov schlantsch e novas ideas en il corps da pumpiers.
A partir dal prim da schaner 2024 vegn Roman Parli a surpigliar l’uffizi da cumandant. Nov vegn ad esser en vigur era la nova lescha da pumpiers. Quella prevesa che l'obligatori da prestar servetsch da pumpiers vala da nov per tuts en la vegliadetgna da fin 45 onns. Sa deliberar da quel obligatori custa da nov 600 francs. Cun quest midament duai il dumber da pumpiers activs puspè vegnir augmentà, di il futur cumandant Roman Parli.
-
Bild 1 von 2. Peider Gotsch a sanestra e Roman Parli. Bildquelle: RTR.
-
Bild 2 von 2. Peider Gotsch surdat a Roman Parli. Bildquelle: RTR.