En Grischun datti plirs chatschaders che fan sez lur muniziun e tenor els è era il pretsch in motiv ch’els produceschan onn per onn dapli muniziun. Er Gian Luca Strimer d’Ardez fa sia atgna muniziun dapi 25 onns. Sia motivaziun principala è la fiduzia e pir en segunda ubain terza lingia il pretsch.
Variar l'effect sin l'animal
Faschond sia muniziun possia el decider tge qualitads e tge effect ch'il projectil ha sin l'animal. El haja uschè bler dapli fiduzia en la muniziun sco cun cumprar da quella producida a moda industriala.
Cun l’augment dals pretschs crescha era la dumonda per cumprar muniziun fatga sezza. Quai constatescha era Gian Luca Strimer. El sez na dastga però betg vender da sia muniziun ad auters chatschaders. Quai scumonda la lescha. El po dentant sustegnair autras persunas ch'han sezzas cumprà il material per far la muniziun.