Dapi il 2019 examinescha la regiun Engiadina Bassa Val Müstair, sch'i saja pussibel da schlargiar il parc da natira sin las vischnancas Scuol e Valsot. Tenor l'examinaziun adempleschan tant Scuol sco er Valsot la gronda part dals criteris necessaris per in parc da natira. Er ord vista giuridica e davart la planisaziun locala fissi pussibel da realisar il project. Cun il parc da natira dettia plinavant ina valurisaziun economica – er sche quella saja, tenor examinaziun, grev da quantifitgar.
Durant l'examinaziun hai dentant er dà vuschs criticas da partenaris regiunals. Las plivalurs d'in parc da natira sajan per blers memia pauc palpablas.
Là avain nus vis ch’igl n’è anc betg madir per suttametter (il project) a la populaziun.
Plinavant hai dà quitads quai che pertutga las restricziuns per la cuntrada. In exempel perquai sajan engrondiments da territoris da skis. Er projects da parc en autras valladas ch'han fatg naufragi, hajan rinforzà la tenuta critica. Il comité ch'ha fatg l'examinaziun relativescha perquai la realisabladad d'in schlargiament.
Visiun da svilup cuminaivel resta vinavant
Sin basa dal rapport han ins decis dad actualmain betg persequitar vinavant l'extensiun dal parc da natira. La visiun da sa sviluppar vinavant communablamain resta dentant vinavant. «Il project n'è betg mort dal tut», uschia Victor Peer envers RTR. L'engrondiment dal Reservat da Biosfera cun tut il territori da Scuol e Valsot saja dentant sut maisa.
Sco la regiun Engiadina Bassa Val Müstair scriva, vegnia vinavant a dar in comité ch'entretscha tut ils acturs en la regiun davart il tema persistenza. I va pia per in svilup communabel e coordinà. La finamira centrala saja, da rinforzar il reservat da biosfera d'UNESCO en favur dal svilup regiunal.