Als lais da Silvaplauna e Segl - Il mecca dals sportists d'aua

Impressiuns dal lai da Silvaplauna

A la riva dal lai da Silvaplauna è il center da surf, il center da sport ed il campadi. Apaina ch'il vent cumenza en il decurs da l'avantmezdi datti lura vita sin il lai turchis. Sin la part sut vers Surlej sa mettan en moviment ils kitesurfers, sin la part sura ils windsurfers. Blers dad els han lur homebase en in bussin, ina tenda ni ina rulotta sin il campadi.

Blers sportists d'aua al Camping Silvaplauna

Chalur e bun'aura: quai saja il recept per avair blers giasts sin il campadi. Quai di la manadra dal camping Silvaplauna, Clarita Wyss. Dapi matg haja ella stagiun auta. Ina gronda part dals giasts sin il campadi sajan sportists d'aua. Il campadi sa chatta gist sper la scola da surfing – pia en ina situaziun privilegiada per surfras e kiters.

Sin la bartga dal lai da Segl

In pau auter è l'atmosfera sin il lai da Segl. Sin quest lai èn plitost da viadi bartgas a vela e bartgas da pestgaders. Sin il pli grond dals lais da l'Engiadin'Ota è dentant era da viadi ina bartga da lingia. Tenor atgnas indicaziuns èsi la pli auta bartga da lingia da l'Europa.

Enfin trais giadas al di va quella tranter la mitad zercladur e la mitad october davent da Segl a Malögia ed enavos. Il chapitani Franco Giani fa quai dapi plirs decennis e la bartga è dapi trais generaziuns en mauns da la famiglia Giani.

Impressiuns dal di