La guerra en l’Ucraina occupa ils abitants da l’Engiadin’Ota. Numerusas persunas, entiras famiglias èn vegnidas en las localitads da la protecziun civila a Samedan per deponer lur donaziuns.
La solidaritad ed il sustegn che vegn demussà envers nossa acziun è fitg gronda. Nus n’avain insumma betg fatg quint cun quai.
Ina chaussa da cor
Mintgina e mintgin ch'ha contribuì insatge vid l’acziun lantschada da la coordinatura Karin Last (sut l’organisaziun da tetg da «refurmo») ha suttastritgà ch’i sajan donaziuns che stettian a cor. Almain pon ins gidar en questa maniera, er sche quai saja be ina pitschna contribuziun.
Impressiuns acziun d'agid a Samedan
Ramassà u cumprà
Entant ch’ils ins han mess ensemen rauba e medicaments ch’els han gia gì en chasa, han autras fatg spontan cumissiuns en butia ed han cumprà entirs palets cun barschuns da dents u pavel per animals.
L’acziun da ramassar rauba per l’agid en Ucraina cuntinuescha tenor Karin Last er las proximas emnas. Actualmain prendian ils numerus voluntaris encunter tut mintgamai il glindesdi e la mesemna saira sco er la sonda bun’ura.
En in emprim pass vegnian las donaziuns transportadas en in deposit a Cuira per suenter cuntinuar il viadi en direcziun Ucraina.