L'interpresa Heli Bernina SA è vegnida fundada il 1985 dad Ueli Bärfuss e Leo Caminada. A l'entschatta avevan els in helicopter – in Aérospatiale Lama – e dus collavuraturs. Il team è dentant creschì spert. La lavur principala era oravant tut sgols da salvament ensemen cun medis. Speras ha il helicopter dentant era transportà 4'500 tonnas material per plazzals en las muntognas.
Gia l’onn 1964 era il fundatur Ueli Bärfuss engaschà sco manader da la basa a Samedan, da quest temp sco pilot per la aviatica da salvament Svizzer ed era per far sgols commerzials. Sco ses figl Hansueli di, n'avess el pli probabel betg fundà la firma persul, igl haja duvrà in team da sustegn per ch'igl funcziuni.
Legenda:
RTR
L'istorgia da la Heli Bernina
Avrir la boxSerrar la box
1985:
Ueli Bärfuss e Leo Caminada fundeschan l'entschatta da mars la Heli Bernina SA. Els han dus collavuraturs ed in helicopter.
1990:
L'interpresa survegn in agen hangar e decida da dar colur mellen ils helicopters. Grazia al stemprà «Vivian» datti blera lavur.
1999:
L'enviern da lavinas chaschuna blera lavur. Durant pliras emnas sgolan tut ils helicopters da la Heli Bernina per evacuar persunas e siglientar lavinas.
2000:
Ueli Bärfuss va en pensiun ed ils helicopters sgolan passa 20'000 uras. I dat in grev accident tar in'atterrada en ils culms, il schefmecanist mora.
2003:
Durant ils campiunadis mundials da ski alpin a San Murezzan lavuran en tut 14 helicopters durant duas emnas per l'eveniment.
2011-2014:
Per las normalas lavurs sgola la Heli Bernina era missiuns da sustegn per la segirtad publica en Grezia, Macedonia ed en l'Albania.
2017:
La bova da Bondo ha procurà per la pli lunga ed intensiva missiun da la Heli Bernina.
2019:
Onn da record cun blera lavur pervi dal stemprà «Vaia» e la renovaziun da la Chamanna d'Es-cha
La segunda generaziun – Hansueli Bärfuss
Il 1998 ha la segunda generaziun, il figl Hansueli Bärfuss, surpiglià il timun da la fatschenta. L'onn 2'000 è Ueli Bärfuss ì en pensiun. A Hansueli Bärfuss èsi impurtant da dar vinavant la motivaziun per la lavur ed il mund da l'aviatica, era a la terza generaziun da la famiglia che lavura era tar Heli Bernina. Entras quella gronda motivaziun e l'engaschi da tuts è la firma era creschida. Actualmain posseda ella trais helicopters ed i lavuran 25 collavuraturas e collavuraturs per Heli Bernina.
Airbus Helicopters H125
Avrir la boxSerrar la box
Legenda:
In model H125 da la polizia da Turitg. L'immatriculaziun ha duas parts: HB correspunda al «CH» tar l'auto, ils trais bustabs suenter èn il «numer» individual dal helicopter. Tar helicopters entschaiva quel savens cun «Y» u «Z».
Keystone
La Heli Bernina posseda trais helicopters dad Airbus.
immatriculaziun: HB-ZMU, HB-ZSV, HB-ZUK
spertadad maximala: 287 km/h
autezza da sgol maximala: 7'010 meters
radius d'acziun: 638 km
prestaziun: 847 PS
Legenda:
Hansueli Bärfuss, il mainagestiun da la Heli Bernina SA.
RTR
La Heli Bernina fa oz transports da persunas, engaschaments da lavur per l'economia d'alp, da construcziun e da selvicultura, sgols da provediment, acziuns per la segirezza publica, salvament per umans ed animals sco er numerusas autras acziuns.
Scolar sez mecanists
La mancanza da persunal è era in tema per la Heli Bernina SA. Oravant tut en las professiuns tecnicas saja grev da chattar avunda glieud. Perquai scolescha la firma era sezza mecanists da helicopter ed emprova da motivar ils giuvens da surpigliar ina tala professiun.
La tecnica ed oravant tut il mantegniment da quella è per nus l'a ed l'o.
En tut hajan ins gia scolà 9 mecanists da helicopter. E Hansueli Bärfuss vul era mantegnair la scolaziun en l'atgna interpresa.
Co daventar mecanist da helicopter
Avrir la boxSerrar la box
La scolaziun sco tecnicist d'aviuns u helicopters cuzza 3 u 5 onns, tut tenor las enconuschientschas professiunalas preliminaras e vegn absolvida sco segunda u sco furmaziun supplementara.
I n'è betg necessari in examen d'admissiun.
La basa è la scolaziun pratica tar in manaschi spezialisà da mantegniment per aviuns u cun helicopter. La scolaziun teoretica vegn organisada en curs da moduls Associaziun svizra dals manaschis aviatics.
Suenter avair terminà cun success tut ils curs pon ins dumandar suenter 3 u 5 onns ina licenza da mantegniment. Questa licenza è renconuschida en l'entira Europa. Cun reussir l'examen professiunal federal datti plinavant il titel sco tecnicista d'aviuns u helicopters.
