La mitad dals onns 1990 regnava ina tscherta malcuntentientscha a Samedan areguard la situaziun linguistica. Il tudestg era vegnì bler pli ferm ed adina dapli geniturs han gì l'impressiun che lur uffants na vegnian betg promovids avunda en la lingua tudestga. Perquai ha la scola cun sustegn dal chantun mess en pes in grond project per chattar vias pussaivlas en l'avegnir. L'entira magistraglia era il team da project, ch'è vegnì accumpagnà dad ina gruppa da geniturs, l'inspectur da scola, il psicolog da scola, las autoritads e d'in represchentant chantunal. Sco resultat è vegnì introducì l'onn 1996 il model da la scola bilingua. In model che pliras vischnancas han entant surpiglià.
Festivitads cun in onn retard
Empè da l'onn passà vegn il giubileum da 25 onns festivà quest onn. La finamira saja da render puspè pli attent la bilinguitad en vischnanca, di Nina Dazzi, l'incumbensada per la bilinguitad a Samedan. Dapi la mitad da matg pendan binderas en la Via Retica ed en las butias vegnan messas si tavlas cun il vocabulari correspundent. En pli è previs dad esser preschent a pli u main tut las occurrenzas ch'han lieu durant la stad en vischnanca. Era ils scolars duain vegnir activs al margà emnil. Sin ina festa gronda desista la vischnanca.