Il furnitur d'energia grischun Repower ha fatg l'emprim semester da l’onn 33 milliuns francs gudogn – quai èn 9 milliuns pli pauc che l'onn passà. Sco l'interpresa communitgescha, saja la dumonda per energia stada pli pitschna en l'Italia dal nord. Quellas entradas sajan perquai crudadas per 15 milliuns francs. Positiv per il resultat sajan però ils auts pretschs sin il martgà d'electricitad en Svizra.
Pli pauca fo rza idra ulica
La producziun cun forza idraulica saja ida enavos per 30%. Il motiv perquai sajan la stad sitga e pauca aua da naiv. La producziun solara en Italia saja creschida per 5% e duai a crescher vinavant. Repower haja investì 3 milliuns en la modernisaziun da las ovra solaras en Italia. Totalmain haja l’interpresa da Poschiavo investì 30 milliuns en il mez onn, 21 dalonder en Svizra. En pli vul l’interpresa cumenzar la planisaziun d'ina ovra idraulica en la chavorgia Chlus en il Partenz.
Cunquai che la Repower vendia la gronda part da sia energia ordavant, sa mussian las midadas da pretsch massivas chaschunadas da la guerra en l'Ucraina pir cun retard en il resultat. La volatilitad dal martgà d'energia vegnia ad influenzar fermamain ils proxims resultats da l'interpresa, hai num en la communicaziun. Ier aveva Repower annunzià ch'ils pretschs muntan per 13% per il 2023.