Ils 1'522 contracts d'emprendissadi ch'èn vegnids suttascrits quest onn en il Grischun correspundan a la media dals ultims tschintg onns (1'545). Ils emprendissadis ils pli populars èn ils medems sco ils ultims onns:
- Commerziant EFZ (118 emprendistas e 101 emprendists)
- Spezialista da sanadad EFZ (18 emprendists e 104 emprendistas)
- Spezialist da commerzi en detagl EFZ (39 emprendists e 58 emprendistas)
E pervia da la demografia, pia perquai ch’i dat actualmain pli paucs giuvenils datti era pli paucs ch’èn en tschertga d’ina plazza d’emprendissadi. Per Curdin Tuor, il manader da l’Uffizi per la furmaziun professiunala èsi impurtant d'accentuar che 80% da quels e quellas che vegnan or da la scola, fan in emprendissadi.
Dapi onns avain en il chantun 80% dals giuvenils che fan in emprendissadi e 20% che van vinavant en scola.
Era l’emprendissadi sco spezialista da communicaziun en l'hotel è daventà pli popular ils ultims tschintg onns. Pia en ina da las branschas che pateschan tranter auter era da la mancanza da persunas dal fatg.
Dentant ston ins relativar las cifras dals emprendissadis cun quai ch’i dependa enorm da la purschida da las plazzas en il chantun. E cun l’ospital chantunal, ils ospitals regiunals, diversas clinicas ed era cun las bleras regiuns da turissem datti bleras plazzas per ils emprendists ed emprendistas.
Però be perquai che las plazzas d’emprendissadi èn pli dumandadas u popularas na vul quai betg dir che tut las plazzas èn occupadas. Er entaifer la branscha da gastronomia datti differenzas: È la spezialista da communicaziun en l'hotel dumandada, datti percunter ils ultims onns adina pli paucs cuschiniers e cuschinieras. Tenor Marc Tischhauser, il mainafatschenta da Gastro Grischun mancan ils emprendists ed emprendistas dals auters chantuns – pli baud èn blers vegnids en ils buns hotels en Engiadina. «Uss datti era buns hotels cun pliras stailas en las citads ch'èn pli datiers al dachasa dals emprendists ed emprendistas», di Tischhauser.
Lavurs manualas anc adina tschertgadas
Tenor il manader da l’Uffizi per la furmaziun professiunala, Curdin Tuor, na dastg'ins betg pauschalisar che lavurs manualas vegnan tschernidas pli pauc e lavurs en il biro pli savens. Il suandant exempel suttastritga quai: Ils ultims tschintg onns han pli paucs fatg in emprendissadi sco commerziant e commerzianta entant ch’il dumber da puras e purs s’ha dublà.
Dentant di il manader da furmaziun da basa al Plantahof Beat Elmer:
Blers dals absolvents fan suenter vinavant cun ina segunda scolaziun u fan in studi.
