La Lia Rumantscha intervegn tar il Servetsch da mediaziun da la SRG SSR Svizra tudestga. Raschun è l'emissiun «Tagesgespräch» dals 8 da fanadur sin Radio SRF, scriva la Lia en ina communicaziun. L'emissiun ha tematisà la plurilinguitad da la Svizra. Il rumantsch, ina da las quatter linguas naziunalas, n'è dentant betg vegnì menziunà.
Repetidamain han las participantas ed ils participants dal discurs enumerà il tudestg, il franzos ed il talian en exempels tipics per la Svizra tudestga, la Svizra franzosa ed il Tessin. Il rumantsch percunter n’è vegnì menziunà gnanc ina giada en l’emissiun da var 17 minutas.
Plinavant saja sulet il Tessin vegnì duvrà sco sinonim per il territori linguistic talian. Ma er en Grischun datti territoris italofons.
Uss prenda il servetsch da mediaziun per mauns la reclamaziun
Uss s'occupa il servetsch da mediaziun da la SRG SSR dal cas. El controlla, sche las renfatschas da la Lia èn giustifitgadas e dumonda a la redacziun dal Tagesgespräch da prender posiziun. Il pli tard en 40 dis publitgescha il servetsch, sch'els sustegna u sch'el renviescha la reclamaziun.
Per tadlar curt e concis:
