Il parlament communal da Domat dumbra 15 commembras e commembers da quatter differentas partidas. Cun tschintg sezs ha il Center actualmain las pli bleras persunas en la legislativa communala. Plinavant è er il president da Domat Erich Kohler commember da la partida dal Center. El è vegnì reelegì il zercladur passà.
Ils socialdemocrats han actualmain quatter persunas che fan part dal parlament, la partida populara ed ils liberaldemocrats mintgamai trais.
Participaziun constanta
Cunquai che Domat dovra il sistem da proporz per eleger, èn sulettamain persunas ch'èn part d'ina da las partidas grondas che sa participeschan a las elecziuns. Persunas senza partida n'avessan strusch ina schanza da far il sigl en il parlament communal.
Cun la pli gronda delegaziun va la Partida populara svizra a la partenza. Betg main che 12 candidats da la PPS vulan conquistar in sez. Il pli enonuschent è probabel Ronny Krättli ch'è era deputà en il Cussegl grond. El è da chattar sisum la glista, e quai duas giadas.
Las ulteriuras partidas van cun pli pauca glieud en cursa, dentant cun pli bleras persunas ch'èn duas giadas sin la glista. La PS ed il Center tramettan mintgamai otg persunas en quest cumbat, ed ils liberaldemocrats tschintg persunas.
Sco quai che l'administraziun communala da Domat ha communitgà, è la participaziun pli u main tuttina auta sco avant quatter onns.
