La finamira era clera. Las radund 70 preschentas e preschents duain retschaiver entaifer duas uras in purtret da mintga candidata e candidat. Il manader dal podium Andri Franziscus ha pretendì respostas curtas ed ina clera posiziun.
Da regiunal enfin internaziunal
Las finamiras regiunalas sco per exempel la planisaziun locala u la mancanza d’abitaziuns per indigens en l'Engiadin’Ota en stads temas centrals. Tar quests temas duai daventar mintga singula vischnanca activa, ed il chantun duai avair ina funcziun da sustegn.
La candidata ed ils tschintg candidats han era prendì posiziun areguard divers projects pendents dal chantun Grischun. Quai eran per exempel ils sviaments – sco quel da la via principala Malögia, da Susch, da Santa Maria e da La Punt Chamues-ch. Las respostas eran fitg variablas. Jon Domenic Parolini e Roman Hug sco era Martin Bühler priorisassan la via principala Malögia. Carmelia Maissen ha betg vuli giuditgar. Per Markus Caduff duess quel project avair prioritad nua che n’existan nagins recurs. Peter Peyer ha manegià ch’il project en Val Müstair ha las meglras schanzas da vegnir realisà sco emprim.
In ulteriur tema chantunal era la colliaziun dal tren da Scuol cun il Tirol dal Sid. Qua era l’opiniun unisono. Quel na vegnia betg realisà en ils proxims 20 onns.
Finalmain han las persunas ad il podium era stuì dar resposta a temas internaziunals sco la posiziun da la Svizra areguard las sancziuns vers la Russia, u la relaziun cun l'Uniun europeica.
Hug e Maissen cun vista communala
Fertant ch'ils cussegliers guvernativs en uffizi han gì in tschert avantatg causa lur experientschas politicas sin livel chantunal, han per exempel Roman Hug e Carmelia Maissen sco presidenta e president da vischnancas pudì dar respostas fitg concretas en temas communals. Martin Bühler ha pudì far puncts cun prender posiziun tar temas chantunals.
Tgi daventa finalmain cusseglier guvernativ?
Questa davosa dumonda as ha era fatg il manader dal podium Andri Franciscus. Carmelia Maissen sperescha che la populaziun elegia ina dunna. Marcus Caduff è restà neutral ed ha ditg ch’el surlascha quella resposta a la populaziun. Per Jon Domenic Parolini fissi impurtant d'avair in cusseglier da l’Engiadina e da las Vals dal Sid. Per Roman Hug n'èn trais candidats da l’Allianza dal center betg ina soluziun. Peter Peyer e Martin Bühler pretendan che lur partidas, numnadamain la PS ed il PLD hajan in dretg sin in sez.
La discussiun al podium è stada organisada da diversas partidas politicas da l‘Engiadin’Ota, ed ha gì lieu en il Rondo a Puntraschigna.
