Tar ina dumonda èn tut las persunas dumandadas dal medem avis: I vegn fitg interessant tar las elecziuns da l'onn proxim ed igl è fitg grev da far prognosas.
Ma quai è ina fitg greva dumonda.
La maioritad da deputadas e deputads che RTR ha dumandà a l'ur da la sessiun dal Cussegl grond manegian: Ils trais cussegliers guvernativs en uffizi - Marcus Caduff, Peter Peyer e Jon Domenic Parolini - vegnan reelegids. Quai saja per ordinari uschia. In u l'auter deputà ha dentant er mess en dumonda questa tesa. Dentant sco ditg, i saja grev da far ina prognosa.
Dals trais novs nums sin il carussel per la regenza grischuna - Roman Hug, Martin Bühler e Carmelia Maissen - vegn cunzunt in num numnà savens, quel da Carmelia Maissen. Ad ella vegn attestà bunas schanzas da vegnir elegida.
Jau crai che Carmelia Maissen vegn schon elegida.
Per il tschintgavel sez pudessi vegnir il pli interessant: Sche Roman Hug u Martin Bühler va cun la plima, è per blers la gronda dumonda. La resposta sin quella dattan votantas e votants lura ils 15 da matg da l'auter onn.
1 dunna e 5 umens sa mettan en il cumbat per l'elecziun dals 15 da matg 2022:
- Peter Peyer (en uffizi, Partida socialdemocratica)
- Carmelia Maissen (nova, Allianza dal Center)
- Jon Domenic Parolini (en uffizi, Allianza dal Center)
- Marcus Caduff (en uffizi, Allianza dal Center)
- Martin Bühler (nov, Partida liberaldemocratica)
- Roman Hug (nov, Partida populara)