Il termin na vegn betg spustà: Il Cussegl grond elegia definitivamain en sia sessiun d'avust ils derschaders da la Dretgira chantunala dal Grischun. Quai ha decis la conferenza dals presidents dal Cussegl grond. Plirs dals presidents da fracziun han confermà quai sin dumonda dad RTR.
Avant la decisiun avevan la Partida populara e la Partida socialdemocratica vulì spustar las elecziuns. Raschun è che la fidanza en ils derschaders dad oz na saja betg pli dada e ch'i dovria dapli temp per chattar novs candidats.
Las duas partidas n'han dentant betg pudì sa far valair cunter las partidas dal center. Uschia vegnan ils derschaders elegids anc l'avust.
Tar la Dretgira chantunala hai dà problems pervi d'in culm da pendenzas ed ina dispita entaifer il gremi dals derschaders.
Plinavant ha la conferenza da presidents era decis da tegnair la sessiun d'avust en la halla da la citad a Cuira e betg en la sala dal Cussegl grond.
