Il Cussegl federal propona da promover dapli il dossier da pazientas e pazients electronic, or da quest motiv ha el decis en sia sesida da mesemna trametter en consultaziun ina revisiun da la lescha federala davart quel dossier. En avegnir duai la Confederaziun manar e finanziar il svilup dal dossier electronic.
Er per praticas da medias ed apotecas
Nov duain er il persunal da praticas da medias, apotecas e praticas da fisioterapia duvrar il dossier electronic da pazients e pazientas. Uschia vul el etablir il dossier sco instrument impurtant per la medischina. Ospitals e chasas d'attempads ston gia far diever dal dossier.
En il dossier stattan tut las infurmaziuns relevantas per tgirar ina persuna. Custar vegn quel a persunas da la Svizra nagut, è la proposta. E persunas che na vulan betg in dossier, han da refusar activamain, uschiglio survegnan ellas automaticamain in.
Protecziun da datas
Sco ch'il Cussegl Federal scriva, haja la segirtad e la protecziun da datas ina prioritad auta. Cun la revisiun da lescha valian vinavant ils pli auts standards da segirtad. Las datas vegnian arcunadas a moda codada tar interpresas domiciliadas en Svizra ch'èn suttamessas al dretg svizzer.
Ulteriurs puncts
Ulteriuras propostas fa il Cussegl federal davart tgeninas incumbensas che chantuns e Confederaziun ston surprender, e cura che las datas dastgan vegnir duvradas da la scienza. La revisiun da la lescha federala sur il dossier electronic da pazientas e pazients va uss en consultaziun fin ils 19 d'october, scriva il Cussegl federal en ina communicaziun.
