La tractanda principala da la sesida dal Cussegl communal da Domat da glindesdi saira èn stads il preventiv 2024 e la fixaziun dal pe da taglia. Domat quinta tar entradas da var 47,3 milliuns francs cun in surpli d'expensas da var 365'000 francs. Malgrà damain entradas tar la gulivaziun da finanzas e las taglias da las persunas giuridicas preschentia la suprastanza communala praticamain in preventiv equilibrà, ha il president communal Erich Kohler ditg a la Somedia. Era la reducziun da taglia tar las persunas natiralas per dus puncts sin 85% n'haja betg gì ina influenza negativa. Sur dal budget sco era la decisiun da laschar il pe da taglia tar 85% decida il suveran da Domat ils 26 da november a l'urna.
Var 18 milliuns per investiziuns
Cun 7,8 milliuns va ina gronda part da questa summa en il project d’abitaziuns per persunas attempadas «Residenza Ensemen». Ils credits che resultan là vegnan refinanziads en il decurs dals onns tras entradas da locaziun. Cun 2,4 milliuns vegnan adattadas las terrassas dal santeri als basegns da persunas cun impediments. Cun quels daners vegn era finanzià la construcziun d’in mortuari.
Plinavant vegnan era investids 750’000 francs en ina colliaziun cun il provediment d’aua da la vischnanca da Tumein. Quai per il cas d’ina crisa. Sco adina va era l’auter onn ina gronda part da las investiziuns en il mantegniment da las vias.
