Tut en tut haja funcziunà
La midada sin online haja funcziunà pulit bain tar la scola auta da pedagogia e tar la scola auta spezialisada dal Grischun. Quai cunzunt perquai che omaduas scolas hajan cumenzà gia il schaner ed il favrer a sa preparar per il cass che las scolas stoppian serrar, dian ils recturs da las duas scolas.
Midada simpla per la FHGR
Damai che la scola spezialisada dal Grischun, la FHGR, ha gia daditg pliras prelecziuns online, saja la midada tenor il rectur da la scola, Jürg Kessler, stada detg simpla. Ins haja pudì midar senza interrupziun sin l'instrucziun online. Per ils studis che n'eran avant anc betg online, hajan ins gì in plan pass per pass, co che la midada duaja succeder.
Sfidas tar la SAPGR tar roms creativs
Era tar la Scola auta da pedagogia sajan ins stà preparà per quest cas. Ma tar ils roms creativs u sportivs saja la midada sin online ina gronda sfida. Annatina Dermont ch'instruescha il rom d'art textil e tecnic a la Scola auta da pedagogia, na l'emprim mument betg savì co far. Ma grazia a discurs cun ils collegas ed ideas creativas funcziunia quai entant pulit bain. Annatina Dermont accumpogna uss ils students da la SAP tras conferenzas da video durant che quels zambregian davent da chasa. Il material da zambregiar trametta ella per part schizunt a chasa als students.
