Ina teologa ha cumenzà ina petiziun online per sa distanziar da la decisiun da l'administratur apostolic Peter Bürcher, da relaschar il vicari general da la Svizra Centrala, Martin Kopp. La petiziun pretenda che Bürcher sto sa dircurrer cun Kopp e che Bürcher piglia enavos sia decisiun. I na dettia nagina raschun pertge che Kopp na duess betg cuntinuar cun ses uffizi.
L'uvestgieu da Cuira aveva relaschà Kopp, suenter ch'el era s'exprimì tranter auter en la NZZ am Sonntag davart la successiun da l'uvestg a Cuira. Uschia aveva el cunterfatg a l'ordinaziun da Peter Bürcher da betg s'exprimer medialmain en quest connex.
Petiziunaris pretendan arguments
Sche l'administratur apostolic Peter Bürcher tegnia vid sia decisiun lura spetgian els almain ina argumentaziun tenor metodas e criteris d'in agir responsabel, uschia ils petiziunaris. Decisiuns sajan da pigliar a moda transparenta, da discutar cun ils pertutgads e d'argumentar raschunaivlamain.
Sche Peter Bürcher na curregia betg sia decisiun lura promovia el tenor ils petiziunaris ch'ins giaja anc pli fitg in ord l'auter entaifer l'uvestgieu. Uschia ristgia el che anc daplirs cartentas e cartents sa distanzieschian da la baselgia.
