En il Grischun eran in zic dapli persunas senza lavur il schaner. Cumpareglià cun il december è il dumber dals dischoccupads creschì per 97 sin 1'257. Quai mussan las novas cifras da l'Uffizi per industria e mastergn dal chantun. La quota da dischoccupaziun è cunquai il mument tar 1,2%. La raschun per l'augment saja surtut la fluctuaziun stagiunala.
Guardà sur l'entira Svizra è la quota creschida per 0,1 sin 2,2%. Cumpareglià cun ils ultims onns è quella però anc adina sin in fitg bass nivel. En tut è il dumber creschì da 96'941 sin 100'776 persunas dischoccupadas.
Lavur curta en Grischun
Il schaner 2023 han 84 manaschis survegnì indemnisaziun per lavur reducida. Cumpareglià cun il december èn quai 22 dapli. Quella cifra na saja dentant betg correspundenta cun la situaziun actuala perquai ch'ils manaschis han a partir da la perioda da rendaquint trais mais peda da pretender l'indemnisaziun.
