En il Grischun èn 1’047 persunas stadas senza lavur il favrer. Quai sajan 240 pli pauc ch’anc il schaner. La quota da dischoccupaziun muntia ad 1%. Quai ha communitgà l'Uffizi per industria, mastergn e lavur dal Grischun. Da las 1'047 persunas dischoccupadas èn 323 dunnas e 725 umens. Il pli aut dumber da dischoccupads ha registrà l'industria da construcziun (287), l'hotellaria (129), ils fatgs da sanadad e socials (77) sco era il commerzi en detagl (62).
Era en l'entira Svizra è il dumber sa reducì
En l’entira Svizra saja il dumber da dischoccupads sa reducì per 1’300 sin bunamain 112'000. Quai correspunda ad ina quota da dischoccupaziun da 2,4%.
Sis manaschis cun lavur reducida
Il favrer han sis manaschis survegnì indemnisaziuns per lavur reducida en il Grischun. Maximalmain pudessan esser pertutgads 405 emploiadas ed emploiads. Quai è in zic dapli ch’il mais avant. Il schaner eran quai 4 manaschis e 393 ch'èn eventualmain pertutgads.
