Il schaner 2024 ha il chantun Grischun registrà 1'287 persunas dischoccupadas, quai che munta ina quota da dischoccupaziun da 1,2%. Quai scriva il chantun. En cumparegliaziun cun il mais precedent cun 1’276 dischoccupads n’è il dumber da dischoccupads strusch s’augmentà. Ultra da quai èn vegnidas registradas 903 persunas cun lavur che tschertgan ina plazza. Il schaner 2024 èn pia stadas 2’190 persunas a la tschertga d'ina plazza. En cumparegliaziun cun il mais precedent cun 2’114 persunas che tschertgan plazza è quest dumber s'augmentà levamain.
Da las 1'287 persunas dischoccupadas eran 353 dunnas e 934 umens. Il pli aut dumber da dischoccupads hai dà en l'industria da construcziun (439), l'hotellaria (142) ed ils fatgs da sanadad e socials (89). Il schaner 2024 èn vegnidas vitiers 38 persunas dischoccupadas a lung temp. En cumparegliaziun cun il mais precedent cun 36 persunas dischoccupadas a lung temp è era quella cifra strusch sa midada.
Svizra
En l'entira Svizra è il dumber da las persunas senza lavur creschì da 106'859 sin 113'175 persunas. La quota da dischoccupaziun munta a 2,5%.
Lavur curta en il Grischun
Il schaner 2024 è vegnida pajada ina indemnisaziun per lavur reducida a 24 manaschis. Visavi il mais precedent cun 62 manaschis è il dumber sa reducì. Quests pajaments pertutgan be per ina fitg pitschna part manaschis che fan actualmain giu quint cun l’indemnisaziun per lavur reducida. Plitost sa tracti da dumondas da pajaments per l'indemnisaziun da lavur reducida sin parts da la paja per vacanzas e firads per ils onns 2020 e 2021. Quest dumber na mussa betg il dumber exacta a las interpresas che lavuran a curta vista effectivamain, perquai che quellas han a partir da la perioda da rendaquint respectiva trais mais temp da far valair lur dretg d'indemnisaziun per lavur reducida tar differentas cassas da dischoccupads.
