Dis d'acziun - Grischun metta signal cunter violenza
En il Grischun vulan pliras organisaziuns dar in segn cunter la violenza a chasa e cunter la violenza cunter dunnas. Quai vulan ellas far cun manifestaziuns ed acziuns. In'attenziun speziala vulan las organisaziuns dar a la violenza cunter persunas pli veglias.
La violenza cunter persunas pli veglias a chasa saja in tabu, ha communitgà l’uffizi dal servetsch social. Or da loialitad envers la famiglia, vargugna u tema taschian bleras persunas pertutgadas. Fitg periclitadas èn persunas ch'èn dependentas da tgira. Il maltractament da persunas pli veglias haja bleras fatschas: agressiun verbala, violenza psichica, negligientscha, maltractament finanzial, isolaziun sociala u violenza corporala. Perquai è la violenza cunter persunas pli veglias en il focus durant ils dis d'acziun dals 25 da november fin ils 10 da december.
Violenza a chasa
Avrir la boxSerrar la box
La violenza a chasa cumpiglia tuttas furmas da violenza corporalas, sexualas, psichicas u economicas che vegnan commessas entaifer il perchasa u tranter pèrs maridads u ch'eran maridads u er partenarias e partenaris. Independent da quai sch'il delinquent u la delinquenta vivan en il medem perchasa.
Violenza a chasa è chastiabla e vegn persequitada. La Svizra è entrada en la cunvegnientscha dal Cussegl d'Europa da cumbatter violenza cunter dunnas e violenza a chasa (Convenziun d'Istanbul).
Il post da coordinaziun per violenza a chasa è responsabel per la collavuraziun professiunala ed interdisciplinara da tuttas autoritads ed instituziuns e coordinescha ils dis d'acziun.
Ord l'archiv:
Fridas, smanatschas e violenza. Ina statistica da l'onn 2015 ha mussà che mintga 5avla dunna survegn fridas a chasa. Ina campagna internaziunala ha vulì far attent sin la tematica il 2015.
06:43
video
Violenza a chasa: Mintga 5avla dunna survegn fridas a chasa
