Curt & concis:
- La regenza preschenta, co ch'ella vul investir 40 milliuns en la digitalisaziun.
- Ella definescha «economia» e «furmaziun» sco secturs principals da promoziun, flancà dals secturs da «sanadad», «mobilitad» e «traffic».
- La proposta da lescha da la regenza va uss en consultaziun e duai vegnir discutada l'onn proxim en il Cussegl gron.
Avant bunamain in onn aveva decidì il Cussegl grond da metter a disposiziun 40 milliuns per in program da digitalisaziun – sche la regenza mussia, co ch'ella veglia far quai. Uss èn qua las ideas da la regenza, e quai en furma dad ina «lescha davart la promoziun da la transfurmaziun digitala en il Grischun».
En questa lescha preschenta la regenza grischuna il rom per stgaffir il credit e la furma en la quala ch'ils raps – 40 milliuns francs – duajan vegnir duvrads per la digitalisaziun.
En emprima lingia promoziun da chaus e bursas
La regenza propona da promover la transfurmaziun digitala surtut en dus secturs – numnadamain en l'economia tar l'innovaziun ed il turissem sco er en la furmaziun.
Tar quests dus secturs principals duajan er vegnir resguardads ils secturs «sanadad», «mobilitad» e «traffic».
Consultar uss, debattar l'onn proxim
La lescha, che la regenza propona per pudair investir quests 40 milliuns en la transfurmaziun digitala, va uss en consultaziun – e quai fin ils 20 da settember. Per la stad 2020 saja planisada la debatta en il Cussegl grond, scriva la regenza en sia communicaziun a las medias.
Infrastructura da rait independenta da lescha
En questa lescha betg inclusa è l'infrastructura digitala, vul dir las investiziuns en lingias e raits en la regiuns grischunas. Quellas duajan vegnir fabritgadas or independentamain.
Il medem mument vul il chantun er promover l'administraziun digitala, il uschenumnà «e-government». Questas investiziuns «vegnan finanziadas autramain» scriva la regenza.
RR novitads 11:00