Era quest onn dovri puspè dapli pazienza enfin che la brev cun la disposiziun da la taxaziun definitiva per l’onn 2024 sa tschenta en las stgaffas da brevs. Il motiv è il medem sco quel da l’onn avant: novs sistems interns tar l'administraziun da taglia dal chantun Grischun. Questa giada pertutga quai il sistem da taxaziun, declera il manader da l'administraziun, Angelo Roberto.
Quest onn vegni franc a dar retards. Quella giada èn dentant tuttas e tuts pertutgà, e betg mo intginas persunas.
Per il persunal involvà munta quai da lavurar parallel cun dus sistems, cun il vegl e cun il nov sistem. Quai saja ina gronda sfida che maglia temp e resursas, uschia Angelo Roberto.
Quatter enfin tschintg mais retard
Gia il mars da l’onn passà ha il chantun infurmà la populaziun ch'ins stoppia quintar cun retards enfin ch'ins survegn il quint definitiv da la taglia. Da quellas uras pertutgav quai il register da taglia. La prognosa era in retard da quatter enfin tschintg mais. Guardà enavos para Angelo Roberto, tut cuntents co che l’implementaziun è succedida.
L'atun vegn introducida ina nova applicaziun
La proxima modernisaziun spetga er puspè: Quella giada pertutga actualamain be l'administraziun da taglia dal chantun cun tut lur process interns. Vi da l'applicaziun d'emplenir ora la declaranza da taglia per persunas naturalas na sa mida dentant actualmain anc nagut. Sche tut va tenor plan vegn ina nova versiun da quella implementada l'atun. Planisà fiss dal rest ch'ins po emplenir or il 2026 la decleraziun da taglia per rumantsch.