Decleranza da taglia - Terza pitga: Cura è in bun mument per cumenzar ad investir?

Tenor diversas statisticas è la paja mediana en Svizra circa tar 78'000 francs per onn. Sin quella cifra vegn lura pajà radund 10'000 francs taglia – tut en tut. Tschertas chaussas pon ins dentant deducir da la taglia, sco per exempel la terza pitga. Cun pajar cumplettamain la terza pitga, ch'è quest onn 7'258 francs, fa quai lura anc in gudogn da mo pli 71'000 francs. Ins spargna pia ina bella summa da daners, declera il cussegliader da finanzas Roman Felix.

En Svizra regia l'uschenumnada taglia progressiva. Quai vul dir che pli bler ch'ins gudogna e pli auta è la tariffa marginala da la taglia. Pia, la cifra che mussa quanta taglia ch'ins paja sin quai ch'ins gudogna.

Cura vali d’investir en la terza pitga?

Per pudair investir en la terza pitga, èsi impurtant dad avair daners. E quels mancan savens anc en giuvens onns, saja quai per motivs da scolaziun, studi u simplamain autras prioritads. Roman Felix, ch'è tranter auter era docent da planisaziun da finanzas a la IfFP, recumonda il suandant ad ina persuna giuvna da 26 onns ch'è gist a la fin dal studi

Ils daners ch'èn en la terza pitga na pon ins betg simplamain prender ora per investir en autras chaussas. Las sulettas excepziuns èn per exempel sch'ins cumpra ina atgna chasa, sch'ins lavura independentamain u sch'ins emigrescha. Tenor Roman Felix fetschia dentant quasi adina senn d'investir en la terza pitga.

E dapi quest onn vala schizunt ina nova regla, che pussibilitescha dad investir retroactiv en la terza pitga. Quai vul dir: Sch'ins n'ha in onn betg pajà en el la terza pitga, pon ins pajar suenter quels raps – e quai fin 10 onns pli tard. La suletta premissa è che la terza pitga da l'onn actual sto esser emplenida cumplettamain.