I sa tracta d’ina sentenzia dal fanadur da l’onn passà. Da questa giada han dus derschaders ed ina derschadra decidì en chaussa. Paucs dis pli tard ha il president da la dretgira administrativa che è era derschader, midà in argument en la sentenzia. El ha dentant betg infurmà ils ulteriurs derschaders. Or da quest motiv ha il Tribunal federal a Losanna annullà la sentenzia. Numnadamain ston tut ils derschaders che han decidì era esser d’accord cun las midadas. En quest cas eri uschia, che la persuna che ha fatg recurs ha dumandà per extender il termin. Quai ha il president agiuntà en la sentenzia, senza consentiment dals auters.
Posiziun da la dretgira administrativa
Il Tribunal federal a Losanna di, che questa adattaziun na saja mo stada ina correctura da bellezza – mabain che questa correctura avess pudì midar la sentenzia. Il agir da betg infurmar ils ulteriurs derschaders cunterfa a la constituziun federala. La dretgira administrativa dal Grischun ha prendì posiziun en scrit envers il schurnal regiunal dad SRF: «I sa tracta d' in act processual che vegn manà posteriuramain e che ha chattà via en ils fatgs ed en la motivaziun da la sentenzia. Il proceder è vegnì preschentà en moda transparenta en la sentenzia, uschia che la partida respectiva ha pudì far valair ses dretgs cun il med legal ordinari. Impurtant è: Il dispositiv da la sentenzia n' è betg vegnì midà.» Vinavant ha la dretgira scrit che la decisiun dal Tribunal federal vegn resguardà en il futur.
Betg l’emprima giada
Er avant hai gia dà schabetgs èn la Dretgira chantunala. Per exempel existivan d’ina sentenzia dal 2018 duas versiuns. Il president da la Dretgira chantunala da quest temp duai avair midà la sentenzia en atgna reschia. Ils pertutgads han dentant dementì quai.