Il Cussegl grond ha mesemna gì da tractar trais petiziuns ch'èn vegnidas or dal parlament da mattas.
- Explicaziun sexuala 2.0
- Maletgs erotics nungiavischads e grooming
- Per vestgadira da scola che respectescha la libertad d'expressiun da mattas
E cunzunt la davosa petiziun ha dà da discutar en il Cussegl grond. E quai malgrà che la basa giuridica è clera e schizunt reglada en la Constituziun federala: Vestgadira tutga tar l'expressiun individuala e croda uschia sut la protecziun da la libertad persunala. Il parlament da mattas ha dentant constatà che insaquantas scolas Grischunas han u vulan prescriver tge che va puncto vestgadira e tge na. I va cunzunt per vestgadira tar mattas che mussa memia blera pel.
Las opiniuns èn idas dapart, tgi è da l'avis che quai na saja betg discussiun e che mintgina e mintgin po sa vestgir sco el u ella vul. I saja il problem dals giuvens sch'els na possian betg ir enturn cun quai e betg quel da las giuvnas.
Ina da las argumentaziuns las pli difficultusas era, che scolasts e scolars na pon betg pli sa concentrar sche giuvnas èn vestgidas memia liger.
Auters èn da l'avis ch'i na po betg esser da mussar memia blera pel, quai portia malruaus perquai ch'ils giuvens u schizunt scolasts na possian betg pli sa concentrar.
Per scolasts èsi difficil dad ir enturn cun giuvnas sch'ellas èn propi vestgidas memia liger. Igl è grev da lura betg cuccar cura ch'ins discurra cun ils uffants.
La discussiun è stada animada – la finala ha il Cussegl grond dentant be gì da prender enconuschientscha la petiziun. Cunzunt perquai che la basa giuridica è gia dada da la Constituziun federala.