La sessiun dal december è tradiziunalmain la sessiun nua ch'il budget per l'onn proxim vegn discutà e mess sut tetg. Quel prevesa sco usità in pitschen deficit da bun 10 milliuns francs. Quel pudess questa giada dentant daventar pli grond che previs, perquai ch'i pudess esser ch'i na dat nagins daners da la Banca naziunala svizra. Quella quinta numnadamain cun in deficit da record. Per l'onn 2022 avevi anc dà radund 90 milliuns or da la cassa da la BNS. Tuttina è la situaziun finanziala dal chantun buna, uschia ch'i pudess dar discussiuns puncto sbassar la taglia.
Dapli daners per tgira d'uffants
Cura ch'il budget è lura sut tetg, sto il Cussegl grond er anc reveder la lescha davart la promoziun da la tgira d'uffants cumplementara a la famiglia. Questa lescha datti dapi il 2003, ella è dentant vegnida veglia. Cun la revisiun duai il sistem vegnir pli fair e chantun e vischnancas duain da nov surprender 50% fin 70% dals custs da la tgira ordaifer la famiglia, per exempel en canortas. Fin uss eran quai anc 30% fin 50%. Da princip èn las bleras partidas d'accord ch'i dovra la revisiun, discussiuns da detagls pudessi dentant tuttina dar.
Discussiuns èn er da spetgar pervi da la crisa d'energia. Aposta per questa tematica è vegnì reservà temp per ina debatta speziala, per dumondas e per infurmaziuns da la regenza – il medem ha il Cussegl grond mintgamai er fatg tar la crisa da corona.
Vitiers vegnan anc elecziuns substitutivas per la Dretgira administrativa e per la dretgira da mesiras repressivas per il rest da la perioda d'uffizi che cuzza fin la fin dal 2024. Er sto il Cussegl grond anc decider davart in credit da 40 milliuns per ina gallaria da drenascha la bova da Brinzauls. Vitiers vegnan sco adina anc dumondas ed incumbensas che ston vegnir lavuradas giu.
Temp per dar adia
Per Christian Rathgeb èsi la davosa giada ch'el po preschentar in budget al Cussegl grond. La fin da l'onn surdat el numnadamain la batgetta a ses collega da partida Martin Bühler che surpiglia ses departement. Ed er per Mario Cavigelli èsi la davosa giada ch'el dastga dar pled e fatg al parlament. Er el sto pervi da la limitaziun da temp d'uffizi surdar a sia successura e collega da partida Carmelia Maissen. Sin il plan da lavur dal Cussegl grond è er quest cumià tractandà.